Өзгөн мунарасы

Өзгөн мунарасы Караханийлер династиясынын мезгилинде, XI кылымдын аягында — XII кылымдын башында курулган. «Минарет» деген сөз араб тилинен которгондо «жарык таратуучу» деген маанини билдирет. Минарет намазга чакыруу (азан) үчүн колдонулуп, ошондой эле кароол мунарасы жана шаардын борборун көрсөтүүчү ориентир катары кызмат кылган. Алгачкы бийиктиги 40 метрден ашык болгон. 1902-жылы болгон күчтүү жер титирөөдөн кийин анын үстүңкү бөлүгү урап түшкөн. 1923-жылы минарет калыбына келтирилип, 1974–1984-жылдары реставрацияланып, конструкциясы бекемделген. Бүгүнкү күндө Өзгөн мунарасынын бийиктиги 27,4 метрди түзөт.